Жаңалықтарды Telegram арнамыздан оқыңыз!Былтырдан бері елімізде мектеп, колледж және кәсіпорын арасында үшжақты келісімге сәйкес нақты бағдар бойынша кадр даярлау басталды. Нәтижесінде диплом алған жас маманға жұмыс дайын болады. Ол үшін өңірдегі оқу орындарына дуальды оқыту жүйесіне көшу жөніндегі талап күшейді. Ал қазір аймақтағы алыс ауылдарда механизатор, жүк тасушы, малшы мен ветеринар жетіспейді. Тіпті біренеше елдімекеннің мыңдаған малына бір мал дәрігері ғана ем-дом жасайды.
Мал дәрігерінің міндеті төрт түліктен жылына екі рет қанын алып, вакцина салу. Айтуға оңай болғанымен, машақаты көп қызмет. Өйткені әр малдан алынған қанды нөмірленген жеке құтыға құйып, ережеге сай сақтап, зертханаға дұрыс жеткізу ветеринардың жауапкершілігінде.
Тиянақ Қайыркелдіұлы Зайсандағы колледжден ветринария мамандығын оқып, диплом алған бойда қызметке тұрды. Жалақысы аз болса да, қазір өз ауылында еңбек етіп жүр.
Тиянақ Қайыркелдіұлы, мал дәрігері:
Ветеринария мамандағын ауылда тұрғаннан кейін өзім қызығушылықпен оқыдым. Мал ұстаған кезде өкіріп, сүзіп, тебу де болады. Ең бастысы - қорықпау керек.
Зайсан технология колледжі 8 түрлі мамандық даярлайды. Былтырдан бастап студенттерді аудандағы мекемелердің тапсырысы бойынша әріптестік негізде оқытып жатыр. Нәтижесінде диплом алған жас маман бірден жұмысқа орналасады.
Жанна Әділбекова, колледж директорының орынбасары:
Үш жыл сайын мониторинг жүргізіп отырамыз. Соңғы 3 жылда, мысалы, 2022 жылдан бастасақ, 2022 жылы 70 студентіміз бітірген. Олардың 83 пайызы өз мамандығы бойынша жұмыс істейді. Соңғы 2024 жылы 90 пайыз түлегіміз жұмысқа орналасып отыр.
Жас маман диплом алған соң жұмыссыз қалмас үшін колледждерге дуальды оқыту әдістемесі міндеттеліп жатыр. Бұл жүйенің тиімділігі – жоғарғы курс студенттері оқи жүріп, жұмыс істеп еңбекақы алады.
Қазір өңірдегі 38 колледжде 44 мамандық бойынша 20 мың студент оқып жүр. 448 кәсіпорынмен әріптестік меморандум жасалып, 5000 студент дуальды оқумен қамтылған. Олар шәкіртақының сыртында ай сайын 100-200 мың теңге еңбекақы алады.
Әлима Ақылбек, облыстық білім басқармасы басшысының орынбасары:
Дуальды оқыту кезінде оқушылардың практикадан өтіп жүрген кезеңі еңбек өтіліне есептеледі. Ол да болашақта жұмысқа орналасқан кезде еңбек өтілі болады.
Былтырдан бері әр колледжде құзыреттілік орталықтары ашылып жатыр. Ол орталықтағы мамандар әр студенттің сапалы білім алуын қадағалап, жұмысқа орналасуына жәрдемдеседі.
Олжас Керейхан
