Концерт өткізу кезінде фонограмма пайдалануға тыйым салынды

Енді концерт өткізу кезінде фонограмма пайдалануға тыйым салынды. Бұл Президент қол қойған заңның төртінші бөлігінде көрсетілген. Бұл ереженің телевизиялық түсірілімдерге, жабық өтетін іс-шараларға қатысы жоқ. Бұған қатысты өнер адамдарының пікірі екіге бөлінді. Бірі жанды дауыста ән айтуды қолдаса, енді бірі көп жерде фонограммасыз ән айтуға жағдай жасалмаған дегенді алға тартады. Сондай-ақ, жаңа заңда авторлық құқыққа баса мән беріліп отыр. Яғни радио, теледидар, интернет-платформаларда музыка, бейне, мәтін, сурет сияқты авторлық контент қолданылған жағдайда автордың аты-жөнін нақты көрсету керек. Бұл талап орындалмаса, авторлар сотқа жүгініп, моральдық және материалдық өтемақы талап ете алады.
Рамазан Стамғазиев, Қазақстанның Еңбек сіңірген әртісі, дәстүрлі әнші:

Мен ойлаймын 80-85% біздің әншілеріміздің бәрі фонограммамен айтады. Керек десең, бұл фонограмманың ең сорақысы – өзінің айтып жүрген әнінің сөзін білмейді. Осыдан 10-15 жыл бұрын осы заңды шығару керек еді. Біздің өнер адамдарының өсуі үшін. Жолға қойылған заң, жұмыс істейтін заңды алға қоймайынша біздің өреміз де, біздің биіктігіміз де, ізденісімізде ешқашан дамымайтыны анық.