Жаңалықтарды Telegram арнамыздан оқыңыз!Көп тіл білгенінің арқасында көптің назарына іліккен қыз. 11 тілді жетік меңгерген 19 жастағы Дильнара Ғайнидинова жұртшылықты таңғалдырды. Полиглот ағылшын, қырғыз, татар, қытай, түрік, әзірбайжан және испан тілдерінде еркін сөйлейді. Қазір Түркияда оқып, білімін жетілдіріп жүрген бойжеткенмен тілшіміз онлайн сұхбаттасып көрді.
Дильнара 5-6 жасында-ақ Орта Азия елдерінің тілдерінде жатық сөйлеген. Әкесі әскери адам болғандықтан, шекарадан-шекараға көшіп жүріп үйреніп алған көрінеді. Бір-біріне ұқсас, туыс тілдер болғандықтан, қиындық тудырмады, дейді. Ал 7-сыныпқа көшкенде ағылшын тілінен қатарластарының алды болыпты.
Дильнара Ғайнидинова, полиглот:
Тілге деген қызығушылық болуы керек. Тілді қолдану мақсатын білсеңіз, ешқандай тілді үйрену қиынға соқпайды. Егер тілге деген талпыныс жоқ болса, өзіңізді қанша жерден қинасаңыз да, қиын болады.
Танымал тілдерді меңгеру адамның білім алуына, табыс табуына және өзге де мол мүмкіндіктерге жол ашатыны белгілі. Мұны ерте жастан түсінген кейіпкеріміз ес білген шақтан қытай, түрік, испан тілдеріне ден қойған. Полиглот қыз қазір Анадолы жерінде, Карабюк университетінде білім алып жатыр.
Дильнара Ғайнидинова, полиглот:
Кезінде әл-Фараби атамыз да 70 тілден көп білген ғой. Оның деңгейіне жетпесек те, 20-25 тілге дейін жетсем тоқтаймын деген ойдамын. Себебі болашақта әскери аудармашы болып, өзімнің еліме қызмет етсем деген ойым бар.
Көпшілік бойжеткеннің еңбекқорлығына таңданып, жас жеткіншектер үлгі алып жүр. Арманы асқақ ару тіл үйренуге күнделікті 2-3 сағатын арнайды екен. Болашақта өз тәжірибесімен бөлісіп, өзгелердің де тіл меңгеруіне көмектеспек ниетте.
Ернұр Медет
