Жаңалықтарды Telegram арнамыздан оқыңыз!Солтүстік Қазақстан облысында астан уланып бір күнде екі баласы қайтыс болған әйел бас прокуратураға шағымданды.
Қайғылы оқиға маусым айында Қызылжар ауданындағы Надежка ауылында тіркелген еді. Отбасы кешкі асқа дүкеннен тұшпара мен шұжық алып жеп, 3 және 6 жастағы балалар қайтыс болды.
Анасы мен үйдің тұңғышы ауруханада емделіп шықты. Сараптама балалардың тағам құрамындағы нитраттан уланғанын көрсетті. Екі кісінің өліміне қатысты іс қозғалып, алайда қылмыстық құрамы жоқ деген себеппен қазан айында жабылған. Одан кейін міндетін тиісті деңгейде орындамағаны үшін медбикеге қатысты іс қозғалып, тергеу әлі жүріп жатыр.
Галина Коваленко, Надежда ауылының тұрғыны:
Балалардың тамақтан уланғаны дәлелденді. Жарты жылдан артық уақыт өтсе де, ешкім жазаланған жоқ. Мен екі баламнан айырылдым. Ал айыптылар бостандықта жүр. Әділдік орнайды деген үмітпен Бас прокуратураға арыз жаздым.
Эльмира Кәленова
