Қостанайда қала тұрғыны жылы аялдаманың есігін қасақана қиратқан

Қостанайда белгісіз біреу жылы аялдаманың шыны есігін қасақана сындырып кетті. Көп ұзамай бейнебақылау арқылы бұзақылық жасаған 1992 жылғы қала тұрғыны екені анықталып, ұсталды. Ол айыбын толық мойындап, өрескел әрекетке мастықпен барғанын айтты.

Бұзақының үстінен әкімшілік іс қозғалып, 150 мың теңгеге жуық айыппұл төлеуге міндеттелді. Мұның сыртында өз қалтасынан 200 мың теңгеге жуық ақша шығарып, аялдама есігін қалпына келтірді. Жалпы облыс орталығында 11 жылы аялдама бар, әрқайсының құны 12 млн теңге. Қала әкімдігі тұрғындарды өз игіліктері үшін жасалған қоғам мүлкін сақтауға жауапкершілікпен қарауға шақырады.

Дәуренбек Әбдібек