Астана күні қарсаңында талдықорғандық 100-ге жуық отбасы баспаналы болды

Астана күні қарсаңында талдықорғандық 100-ге жуық отбасы баспаналы болды.

Жаңа пәтер кілттері ұзақ жылдар бойы үй кезегінде тұрған азаматтарға берілді. Қоныс тойын тойлағандар қатарында мүмкіндігі шектеулі жандар, ата-ана қамқорынсыз қалған балалар, көпбалалы отбасылар мен соғыс ардагеріне теңестірілген азаматтар да бар. Жыл соңына дейін тағы елуге жуық көпқабатты тұрғын үй берілуі тиіс. Осылайша жергілікті билік қалада қат боп тұрған баспана мәселесін біртіндеп шешуге кірісті. Облыс орталығында 15 мыңнан астам адам үй кезегінде тұр. Олардың екі мыңға жуығы биыл жаңа шаңыраққа кіреді деп жоспарланған.

Айман Нұрлыбаева, қала тұрғыны:

Қиындықтар көп болды ғой. Пәтерден пәтерге көшіп жүрдік. Баламмен ылғи көшіп жүрдік, қонып жүрдік. Неше түрлі үйде тұрдық. Жеттік осы күнге, шүкір. Мектебіміз де жанымызда тұр. Бәрі қолжетімді. Көп-көп рахмет айтамын.