ШҚО-да алтын өндіретін зауыттың құрылысына қатысты арнайы комиссия құрылды

Шығыс Қазақстан облысы Маралды ауылының маңындағы алтын өндіретін зауыттың құрылысына қатысты Индустрия және инфрақұрылымдық даму министрлігі мен мүдделі мемлекеттік органдар бірлесіп тексерулер жүргізілетін болады. Бұл жайында ведомство басшысы Маралды ауылы халқының өкілдерімен кездесуде айтты.

Марат Қарабаев қазір азаматтардың жеке қабылдауын өткізіп жатыр. Кездесуге Маралды ауылы тұрғындарының атынан бір топ астаналық азамат келіп, жергілікті тұрғындардың денсаулығына және осы жердегі табиғи қорыққа кері әсерін тигізуі мүмкін екенін айтты.

Марат Қарабаев, ҚР Индустрия және инфрақұрылымдық даму министрі:

Келесі жылдың ортасына дейін бұл компания сол жақтағы қазба жұмысымен айналысуға құқығы жоқ, зерттеу жұмысымен айналысуға болады. Сондай тиісті лизенциясы бар. Зерттеу жұмыстары біткен соң қазба жұмыстарына лицензия алу үшін міндетті түрде қоғамдық келісім өткізіледі. Оған жергілікті халық қатысады. Келісім болмаса, лизенция берілуден бас тартылады.