Басты Жаңалықтар Сыр өңірінде өсетін күрішке шет мемлекеттерден сұраныс жоғары

Сыр өңірінде өсетін күрішке шет мемлекеттерден сұраныс жоғары

26.06.2023 22:11

Сыр өңірінде өсетін күрішке еліміздің ішкі нарығымен қатар шет мемлекеттерден сұраныс жоғары. Дақыл Еуропаның 8 еліне экспортталып, жыл басынан бері 16 мың тонна өнім жөнелтілді. Ал бүгін Премьер-Министрдің орынбасары Серік Жұманғарин өңірде өткен республикалық күрішшілер жәрмеңкесіне қатысып, кәсіпкерлермен көшпелі мәжіліс өткізді.

Жыл сайын сырбойылық дихандар 80 мың гектардан астам алқапқа күріш егіп, жерден ырзық-несібесін көріп келеді. Соның ішінде, Лидер, Янтарь, Сыр сұлуы секілді күріш сорттарының өнімділігі жоғары. Қызылордадағы күрішшілер жәрмеңкесіне еліміздің барлық облысынан 120 делегат арнайы келіп, жергілікті шаруашылықтармен делдалсыз тікелей қарым-қатынас орнатуға мүмкіндік алды.

Арман Әбенов, Қостанай облысы әкімінің орынбасары:

Қызылорда күріштің Отаны екенін бәріміз білеміз. 2018 жылдан бері азық-түлік бағасын тұрақтандыру қорына осы өңірден күріш сатып аламыз. Жыл басынан бері бүгінде 200 мың тонна күріш алдырттық. Осындай бастама арқылы барлығын көзбен көріп, байланысымыз нығая түсуде.

Ішкі нарықпен қатар экспорттың да әлеуетін арттыру қажет. Премьер-министрдің орынбасары, Сауда және интеграция министрі Серік Жұманғарин кәсіпкерлермен тілдесіп, олардың ұсыныс-пікірлерін тыңдады. Сондай-ақ, Нағи Ілиясов ауылына барып, күріш өсіріп жатқан шаруалардың тыныс-тіршілігімен танысты.

Серік Жұманғарин, ҚР Премьер-Министрінің орынбасары, Сауда және интеграция министрі:

Әлеуметтік кәсіпкерлік корпорация шеңберіндегі жұмысын толығымен басқаша жасап жатырмыз. Себебі, оның мақсаты тікелей қаражатты шаруаларға, отандық өндірушілерге жеткізу.

Премьер-Министрдің орынбасары азық-түлік бағасын тұрақтандыру бойынша көшпелі мәжіліс өткізді. Жиында «Тауарларды қадағалаудың ұлттық жүйесі» пилоттық жобасы туралы кеңінен айтылды. Сондай ақ өнім өндірушілермен әр өңірден келген әкімдік өкілдері өзара тиімді келісім-шартқа отырды.

Әділбек Серікұлы

Автор

Әділбек Серікұлы

Бөлісу