Жаңалықтарды Telegram арнамыздан оқыңыз!Жетісу облысының Көксу ауданында екі фельдшерлік акушерлік пункт пайдалануға берілді.
Екі ғимараттың жалпы құны – 240 млн теңге. Ақшатоған ауылында ашылған емдеу мекемесі заман талабымен салынып, барлық қажет құрал-жабдықтармен қамтамасыз етілді. Енді ауылдағы ағайын аудан немесе облыс орталығына сабылмай, қажетті ем-домын үй маңынан алады. Жалпы бұл елдімекенде 800-ге жуық тұрғын бар.
Роза Ілиясқызы, ауыл тұрғыны:
Орталыққа барып жүретінбіз. Қазір, міне, өз ауылымыздан ашылып жатыр. Жақсы болды. Жағдайымыздың бәрі жақын жерден реттелетін болды. Ары-бері такси де жоқ. Қаншама қиыншылық көріп кететін едік. Рахмет!
Сондай-ақ дәл осындай фельдшерлік-акушерлік пункт Еңбекшіқазақ ауылында да тұрғындарға есігін айқара ашты. Екі емдеу мекемесі білікті мамандармен қамтамасыз етілді. Жалпы Көксу ауданына соңғы бір жылда 20 дәрігер қызметке келді. Биыл ауданға тағы 3 жаңа фельдшерлік-акушерлік пункт пен 4 блокты-модульді кешен салу жоспарланған. Ал Жетісу облысына жыл соңына дейін жылдам құрастырылатын 23 медициналық пункт салу көзделген.
Қуаныш Қанатұлы
