Еуропа сарапшылары: Реформалар – ел дамуының өзегі

Қазақстандағы жүйелі реформалар елдің дамуына жаңа серпін береді. Елдегі соңғы өзгерістерді талқылаған Еуропа сарапшылары осылай дейді.

Олардың айтуынша, ауқымды бастамалар әрбір азаматтың конституциялық құқығының мүлтіксіз сақталуын қамтамасыз етеді. Сондай-ақ, мемлекет пен қоғамның өзара сеніміне, құрметіне негізделген реформалар жаңа саяси мәдениетті қалыптастырады.

Майкл Левистон, Францияның халықаралық қатынастар институтының ғылыми қызметкері:

Реформалардың мақсаты, Президент Тоқаевтың көздегені – Жаңа, әділетті Қазақстан құру ғой. Демек, елдің барлық азаматына жұмысқа орналасуға, емделуге, өзге де игіліктерге тең мүмкіндік берілетіні қуантады.

Пьер Боргольц, орталық азия елдері бойынша сарапшы:

Елдеріңіздегі әлеуметтік реформалардың жүзеге асырылуы – жас буын өкілдерін ынталандырып, жаңа мемлекет құруға ат салысуына итермелейді. Білім саласына көңіл бөліп, жастарға мол мүмкіндік беру, шалғай аймақтарды дамыту – өте ауқымды шара деп есептеймін.

Н.Қасым, Б.Өмірбек