Жаңалықтарды Telegram арнамыздан оқыңыз!Мемлекеттік күзет қызметінің Президенттік оркестрі Түркияның Бурса қаласында өтіп жатқан ІІ халықаралық әскери оркестрлер фестивалінде өнер көрсетті. ТҮРКСОЙ халықаралық ұйымы өткізген шараға түркітілдес 5 елдің өнерпаздары қатысып жатыр. Олар шахардағы тарихи жерлермен жүріп өтіп, қала халқына өнер көрсетті. Ал кешкілік гала концертте ұлттық және патриоттық әуендер орындалды. Қазақстан Президенттік оркестрінің түрлі жанрдағы өнерімен қатар жауынгерлік сап түзеуі де көрерменді тәнті етті. Осман империясының тұңғыш астанасы Бурса биыл түркітілдес елдердің мәдени астанасы болып жарияланған еді.
Құрмет Бейсембаев, ҚР мемлекеттік күзет қызметі президенттік оркестрінің дирижері:
Жергілікті халық бізді ыстық ықыласпен қарсы алды. Бізбен өзге елдердің кәсіби өнерпаздары да қойылымын көрсетті. Президенттік оркестріміз бұған дейін «Спаская башня», «Бремен тату», «Берлин татум» атты әлемдік деңгейдегі шараларға қатысқан болатын. Дегенмен Түркияға алғаш рет келіп тұрмыз.
Самет Тахмисоғлы, көрермен:
Қазақстандық оркестрдің қойылымы барысында көне түркілердің әскери рухын сезіндік. Өзімді бір аттың үстінде жауға шапқан секілді елестеттім. Әсерімді сөзбен айтып жеткізе алмаймын.
Айдос Әшімұлы
