Алматыдағы өрт: Өрттің шығу себебі анықталуда

Алматыда алапат өрт болып, өндірістік аймаққа қауіп төнді. Төтеншеліктердің хабарлауынша, қызыл жалын қазандыққа қажетті сұйық отын тиелген автоцистернадан шыққан.

Тілсіз жау Ангарская көшесінде орналасқан қоймада тұтанған. Құтқарушылардың сөзінше, қызыл жалын жүк көлігінің қасындағы екі темір цистернаны да шарпыған. Көршілес нысандарға төнген қауіп дер кезінде ауыздықталды. Абырой болғанда қаза болғандар мен зардап шеккендер жоқ. Қазір оқиға орнында тергеушілер жұмыс істеп жатыр. Өрттің шығу себебі анықталуда.

Арман Мәкенов, қалалық ТЖД басқарма басшысы:

Аталған объектіде үш адам жұмыс істеген болатын. Үшеуі де аман-сау. Өрттің жалпы толық ауданы 80 шаршы метрді құраған. Қазіргі таңда анықталу үстінде. Неден шыққаны, қалай шыққаны. Тергеу амалдары жүргізіліп жатыр.

Қуан Нұрақын