Қостанай облысында тасқын судың салдарынан бірнеше бағытта қатынас қиындады

Ағын су Арқалық қаласы маңындағы елдімекендерге баратын жолдың суағарын жырып кетіпті. Соның әсерінен пайда болған шұңқырға далада жайылып жүрген жылқы құлаған. Жолаушылар түсірген тағы бір бейнекөріністен Әулиекөл - Жалдама бағытының 39-шы шақырымында су трассаның үстінен асып ағып жатқанын байқауға болады. Төтенше жағдай қызметінің хабарлауынша, бүгін су деңгейі төмендеп, жолдың бұл бөлігіне кезекшілік қойылыпты. Сондай-ақ Жанкелдин ауданының орталығы, Торғайдан Ақшығанақ ауылына баратын жолдың 15 және 25-ші шақырымы бұзылған. Ал Арқалық қаласында шеткері жер үйлердің ішіне аула мен көшедегі еріген қардың суы кіріпті. Қазір мұнда сорғыларды қолданып үйлерді құрғату жұмысы жүріп жатыр.

Дәуренбек Әбдібек