Жаңалықтарды Telegram арнамыздан оқыңыз!Соңғы екі айда коронавирус жұқтыру деңгейі 2,8 пайызға, көрсеткіші 4 есеге төмендеді. Бұл туралы Денсаулық сақтау вице-министрі Марат Шоранов Үкімет отырысында айтты. Жиында тағы қандай мәселе қаралды. Дәл қазір бізбен байланыста тұрған Раушан Сайлауқызы баяндайды.
Раушан Сайлауқызы, тілші:Қазақстанда екі ай бұрын аптасына 33 мыңнан астам адам ауырған болса, қазір бұл сан 11 700-ге дейін азайған. Балалар арасында сырқаттану 1,3 есеге төмендеген. Бұл эпид жағдайдың тұрақталғанын көрсетеді дейді вице-министр. Екпенің екі компонентін алғандар саны 7,5 млннан асады. Дегенмен көрші елдердегі жағдай күрделі. Осыны ескере отырып, аймақтарда шектеу шараларын күшейту керек деді Премьер-Министр. Коронавирусқа қарсы вакцинациялау қарқынын арттыру қажет екенін де айтты. Сондай-ақ жиында экологиялық мәселелер көтерілді. Министр Қазақстандағы үш негізгі проблеманы атады.
Ол - ауаның ластануы, жер үсті сулары және қалдықтармен жұмыс істеу жүйесінің нашарлығы. Көмірден біртіндеп бас тартып, газ тарту жұмысын күшейту керек. Келешекте көмір өндірісін 70 пайыздан 40 пайызға қысқарту жоспарланған. Керісінше, газдандыруды 38 пайызға ұлғайту көзделген. 2030 жылға қарай қоғамдық көліктерді газбен жүретін техникаға немесе электр автобустарға ауыстыру жоспарланып отыр.
