Елорда: Cауда орталықтары осы демалыста да, келесі демалыста да ашылмауы мүмкін

Демалыс күндері елордадағы сауда орталықтарының қайта ашылатын күні эпидемиологиялық жағдайға байланысты болады. Бұл туралы Нұр-Сұлтанның бас мемлекеттік санитарлық дәрігері Жанна Пірәлиева мәлімдеді.

«Әзірге эпидемиологиялық жағдай келесі демалыс күндері сауда орталықтарын ашуға мүмкіндік бермейді. Қазір бізде жеңілдік жасауға мүмкіндік жоқ, COVID-19 жағдайларын тіркеу жалғасуда. Мәселен, кеше 29 жағдай балалар арасында да, ересектер арасында да тіркелді. Көбінесе олар симптомды түрімен ауырады. Сондай-ақ аурудың алдыңғы аптамен салыстырғанда өсуі байқалады. Бүгін бесінші күні, елорда «жасыл» аймақта тұр, осы көрсеткіштер 14 күн бойы сақталғаннан кейін ғана, жеңілдету туралы айтуға болады», - деп түсіндірді Жанна Пірәлиева.

Сонымен қатар бас санитар дәрігер аймақтың түсі арнайы матрица арқылы анықталатынын атап өтті. Репродуктивті сан аурушаңдық деңгейі бір күнге көтерілген жағдайдың өзінде санау қайта басталады.