Депутаттар зейнет жасын төмендетуді ұсынды

Мәжіліс депутаты Айқын Қоңыров зейнет жасын төмендету мәселесін қайта қарауды ұсынып, Үкімет басшысына депутаттық сауал жолдады.

«ДДСҰ мәліметі бойынша, COVID-19 вирусынан қайтыс болғандардың көбі 60-тан асқан адамдар. Биыл қаңтар-тамыз аралығында қазақстандықтар арасында 110 981 өлім жағдайы тіркелді, оның 78 637- і (71% пайыздан астамы) - 60-тан асқандар. Сондықтан бұл азаматтар үшін қосымша қауіпсіздік шараларын қабылдау қажет», - дейді ол.

Осы орайда «Халықтық коммунистер» фракциясы азаматтарымыздың зейнетке шығу жасын төмендету мәселесін қайта қарауды ұсынды. 

«2013 жылы біз әйелдердің зейнетке шығу жасын көтеруге қатысты реформаны қолдамадық. Бүгін азаматтардың пікірлерін ескере отырып, әйелдер мен ерлер үшін зейнет жасын 60 жас деп белгілеуді ұсынамыз», - деді Қоңыров.