Қазақстан Тәжікстанға гуманитарлық көмек көрсетпек

Қазақстан Тәжікстанға портативті өкпені жасанды желдету аппараттарын жеткізуді жоспарлап отыр.

Бұл туралы Денсаулық сақтау вице-министрі Людмила Бюрабекова мәлімдеді.

«Қазақстан Үкіметі жыл соңына қарай Тәжікстанға портативті өкпені жасанды желдету аппараттарын жеткізуді жоспарлап отыр. Бұл аппараттар стационарда емес, жедел жәрдем бригадасында науқастарды тасымалдағанда пайдаланылады және оны Ақмола облысындағы кәсіпорын шығарады», - деді вице-министр.

Оның айтуынша, қазіргі таңда аталған кәсіпорын өндірістік қуатын арттырған. Олар портативті аппараттардан бөлек, түрік компаниясымен бірлесіп, елге қажет стационарлық өкпені жасанды желдету аппараттарын да шығаруды жоспарлап отыр. Өндіріс таяу арада жолға қойылады.