Қарағандыда халықаралық құсбегілер сайысы өтті

Қарағанды облысында өткен халықаралық құсбегілер сайысына қатысушылар қатары, жыл сайын артып келеді. Жарыста еліміздің барлық өңірінен және Қырғызстан мен Моңғолиядан жиналған 80-ге жуық бүркітші бақ сынады. «Ұлы дала мұрасы» деп аталатын игі шара, Сәкен Сейфуллиннің 125 жылдығына орай ұйымдастырылған.

Жарыстың алғашқы күні құсбегілер қыранын қияға ұшырып, қолына қондырды және шырғаға салды. Әділ-қазылар алқасы құстың тек бабына ғана емес, саятшының киім үлгісі мен құрал-сайманына да баға берді. Айта кету керек, жарыс барысында тек бүркіттердің ғана емес, ителгілердің де бабы сыналды.

Бұл күні жеті қазынамыздың бірі – құмай тазылардың да жарысы өтті. Мамандар 35 иттің арасынан ең жүйрігі мен иісшілін анықтады. «Мақсатымыз — таза қанды тазыларды табу», - дейді ұйымдастырушылар. Жалпы үш күндік жарыс қорытындысы бойынша үздік шыққан қатысушылар бағалы сыйлықтармен марапатталды.

Руслан НҰРЛАНҰЛЫ