Басты Жаңалықтар «GLOBAL-turk» халықаралық журналының алғашқы саны жарық көрді

«GLOBAL-turk» халықаралық журналының алғашқы саны жарық көрді

27.06.2014 08:18

Түркі кеңістігінде жаңа басылым дүниеге келді. Астана қаласындағы Түркі академиясы «GLOBAL-turk» атты сараптамалық-талдау бағытындағы халықаралық журналының алғашқы санын жарыққа шығарды, деп хабарлайды Түркі академиясының баспасөз қызметі.

Басылым түркітанумен ғана шектелмей, Еуразия кеңістігін жайлаған Түркі әлемінің өзекті мәселелеріне қатысты тың зерттеу-мақалалар, түркі интеграциясы туралы терең ізденістерді жариялайды.

Сондай-ақ, Түркі елдері ғалымдары арасында ортақ күн тәртібі мен ғылыми дискурс қалыптастыру да көзделіп отыр.

Өткен айдың басында Түркияның Бодрум қаласында өткен Түркі Кеңесінің IV саммитінде Түркі академиясына түркі әлемі елдерінің интеграциясы жолдарын айқындау үшін бағдарлама әзірлеуді тапсырған болатын. Сонымен қатар, Қазақстан Президенті Нұрсұлтан Назарбаев мүше-елдердің ортақ ақпараттық кеңістігін қалыптастыру ұсынысын жасады.

«GLOBAL-turk» журналы сол міндеттерді орындау мақсатында жарыққа шықты.

Редакция алқасы құрамына Қазақстан, Түркия, Әзірбайжан, Қырғыз Республикасы, Өзбекстан, сондай-ақ, Жапония, АҚШ және Ресей Федерациясы сияқты елдердің ғалымдары мен халықаралық ұйымдардың басшылары, стратегиялық орталықтардың жетекшілері бар.

Екі айда бір рет жарық көретін халықаралық басылымда Түркі Кеңесіне мүше елдер тілінде (қазақ, түрік,әзірбайжан және қырғыз), сонымен қатар, ағылшын және орыс тілдерінде мақалалар жарияланады

Бөлісу