Басты Жаңалықтар Дәрі-дәрмек бағасы қымбаттамайды

Дәрі-дәрмек бағасы қымбаттамайды

13.02.2014 08:30

Дәрі-дәрмек бағасының өспеуін Денсаулық сақтау министрлігі бақылауда ұстайды. Орталық коммуникациялар қызметінде өткен брифингте Денсаулық сақтау вице-министрі осыны жеткізді.

Теңгеге қатысты түзету дәрі-дәрмектің бағасына әсер етеді деп жұрт алаңдаушылығын білдірді. Расында, науқасқа ем-дом қабылдау үшін алдымен дәрі-дәрмек ауадай қажет.

Бірақ, дәрі бағасын өсірмей, әрі сапасын да бірдей қадағалау - басты міндетіміз, деді Байжүнісов. Сондай-ақ, биыл қымбат дәрі-дәрмектердің де бағасы көтерілмейді, деп сендірді.

Жалпы, қазір Қазақстанда тіркелген дәрінің түрі - 7174. Бұл - әлем халқы қолданатын барлық дәрі-дәрмек бізде бар деген сөз. Ал, осы дәрілерді сатып алуға жыл сайын қазынадан 140 миллиард теңгеге жуық қаржы бөлінеді.

Ерік Байжүнісов, ҚР Денсаулық сақтау вице-министрі:

Бюджет қаражатына сатып алынған барлық дәрі-дәрмектің бағасы реттеулі. Бірақ, жекеменшiк бөлшек саудамен айналысатын дәрiханалардағы жағдайды тұрақты ұстау оңай емес. Ал, бізге ондағы бағаларды да қадағалау қажет. Бұл - халықаралық ережелердің міндетті талабы. Осыған байланысты қазір Кодекске тиiстi өзгертулер енгiзуге кірістік. Егер, сәуірде бұл өзгерістер қабылданса, бәрін жөнге келтіру мүмкіндігі туады. Ең негізгісі, елімізде дәрi-дәрмектердiң ұлттық формуляры жасалады.

Алмат ӘБДІРАМАН

Бөлісу