Ауғанстанда соғыстан қаза тапқандардың саны артты

Биылғы жылдың алғашқы алты айында Ауғанстанда соғыстан қаза тапқан бейбіт тұрғындардың саны рекордтық деңгейге жетті. Біріккен Ұлттар Ұйымының баяндамасына жүгінсек, жарты жылда 1692 адам содырлардың шабуылынан және жанкешті лаңкестердің бомбаларынан қаза тапқан. Бұл сан былтырғымен салыстырғанда, 1 пайызға көп.

Өткен айда Ауғанстан қауіпсіздік күштері мен «Талибан» қозғалысы оқ атуды тоқтатуға келіскенімен, бейбіт тұрғындар арасында өлім-жітім азаймай отыр.

Бұл елде 17 жылға созылған қарулы қақтығысты тоқтату мәселесі осы айда НАТО-ның Брюссельде өткен саммитінде талқыланды. Бұл әскери одақ 2014 жылы Ауғанстандағы миссиясын аяқтағаннан кейін тәліптер елдің айтарлықтай бөлігін қайта басып алған.

Арай ТӨЛЕГЕНҚЫЗЫ