Гватемалада жанартау құрбандарының саны 69-ға жетті

Гватемалада жанартау атқылағанда қаза тапқандардың саны 69-ға жетті.  Мұны осы республика билігіне сілтеме жасап, «Associated Press» агенттігі хабарлады. Трагедияға байланысты елде үш күн қаралы деп жарияланған.

Іздеу-құтқару жұмыстары барысында құрбандардың саны тіпті көбеюі мүмкін. Қазір табиғи апат елдің 2 миллиондай тұрғынына кері әсер етіп отыр.

Фуэго вулканы дүйсенбі күні айналаға лава тарата бастады. Таудан төгілген қызыл шоқ жолындағының бәрін күлге айналдырған.

Бұл вулканның биіктігі 3,7 шақырым. Биылдың өзінде «Отты тау» осымен екінші мәрте атқылап отыр. Сейсмологтардың сөзінше, бүгін ол тынышталып, қалыпты жағдайға түсті.

Арай ТӨЛЕГЕНҚЫЗЫ