Грекияда реформаға 20 мыңдай адам наразылық білдірді

Грекия парламентінің жанына 20 мыңдай адам жиналып, реформаларға наразылық білдірді. Демонстранттардың сөзінше, депутаттар мемлекетке қарыз адамның мүлкін тартып алу, отбасылық табысты қайта құрылымдау, шеру өткізуді қиындату туралы заңды қабылдап жіберген. Алайда, билік мұндай қатаңдыққа бармаса, Грекия халықаралық кредиторлардан экономика үшін 6,5 миллиард еуро траншты ала алмас еді.

Қарсылық акциясы полициямен қақтығысқа ұласты. Зардап шеккендер туралы мәлімет түскен жоқ. Манифестанттарды тарату үшін тәртіп сақшылары көзді жасаурататын газ қаруын қолданды. Бірақ, шерушілер күресті тоқтатпауға уәде берді. Олардың айтуынша, қаржылық қысылтая кесірінен Грекиядан 500 мыңдай білімді жас кетуге мәжбүр болған.

Арыстан РЫСБЕК