![Атырауда дауыл ғимараттардың шатырын ұшырып әкетті](https://cdn.qazaqstan.tv/old/articles/6/article_68256.jpg?w=928&h=522&format=jpg&resize=aspectfill&g=center)
Атырауда қатты жел тұрып, бірнеше ғимараттың шатырын ұшырып әкетті. Төтенше жағдайлар департаменті мамандарының айтуынша, секундына 25 метр жылдамдықпен соққан жел бір күннің ішінде облыс бойынша 7 нысанға едәуір залалын тигізген.
Балықшы кенттік округіндегі терможаңғырту бағдарламасы бойынша күрделі жөндеуден өткен көпқабатты үй де табиғаттың «тосын мінезіне» төтеп бере алмады.
Сондай-ақ, желдің қатты екпінімен ұшқан қаладағы жеке компаниялардың бірінің шатыры ғимарат алдындағы 3 жеңіл автокөлік пен бір шағын автобустың үстіне түсті.
Дауыл Жұмыскер елді мекеніндегі аялдаманы да құлатқан. Зардап шеккендер жоқ.
Марат Құрманов, Төтенше жағдайлар департаменті бастығының орынбасары:
Атырау қаласы бойынша 6 жағдай, ал біреуі Құлсары қаласында тіркелді. Онда мектептің шатыры ұшты. Мұндағы жағдай қазір анықталып жатыр. Барлық нысандарда төтенше жағдайлар департаментінің мамандары жұмыс істеуде.
Батырбек ҚУАНДЫҚҰЛЫ
![](https://px.mediadata.kz/s.gif?mh_id=7916e9245b3c5232be2c21bfdafded87&mh_news=Атырауда дауыл ғимараттардың шатырын ұшырып әкетті&mh_tags=Qazaqstan&mh_page=https://qazaqstan.tv/news/31918/)