Басты Жаңалықтар Өскеменде кеншілер жер үстіне шықпай қойды

Өскеменде кеншілер жер үстіне шықпай қойды

30.01.2014 08:30

«Қазақмыс» корпорациясына қарасты Артемьев кенішінің қызметкерлері наразылық білдіріп жатыр. Бүгін түнгі ауысымда жұмыс істеген 100-ге жуық шахтер жер үстіне шықпай қойды. Олардың кәсіпорын басшыларына бірнеше талабы бар.

Біріншіден, техникалық қауіпсіздік ережелерін сақтауға бүкіл ұжыммен жауап беру туралы қағиданы қайта қарауды талап етуде. Яғни, ұжымда бір адам техникалық қауіпсіздікті бұзса, барлығы еңбекақыға қосылатын сыйақыдан айырылады.

Таяуда, кеніште екі оқыс оқиға болыпты, сондықтан жұмысшыларға енді 3 ай сыйақы берілмейді, делінген. Бұдан бөлек, кеншілер жалпы жалақыны өсіруді, жұмыс істеуге жағдайды жақсартуды талап етіп отыр. Біраз уақыт бұрын оқиға орынына облыс басшылығы, прокурор, еңбек инспекциясы және кәсіподақ ұйым өкілдері аттанды.

Қазір олар кеніш қызметкерлерімен келіссөздер жүргізіп, еңбек дауын дұрыс жолмен шешу жөнінде сөйлесіп жатыр. Шемонайха ауданында орналасқан Артемьев кеніші 2005 жылы ашылған. Бүгінде мұнда 1 мыңнан астам адам жұмыс істейді. Олар жылына 1,5 миллион тоннаға жуық мыс, мырыш және қорғасын кендерін өндіреді.

Қанат Сембаев, бұрғылаушының көмекшісі:

Мен бұрғылаушының көмекшісі болып жұмыс істеймін. Ақша төлемейді, 60 мың теңге ғана. Алдында 75 мың теңге төлеп жүрген, ол да жоқ. Жұмыс істеуге жағдай жоқ, сыйақы жоқ.

Антон Плотников, «Кәсіп Қазақмыс» кәсіподақ ұйымының филиал төрағасы:

Қазір кәсіпорын басшылары мен жұмысшылар арасында келіссөздер жүріп жатыр. Менің ойымша, жақын арада жағдай оң шешімін табады.

Берік КӨШЕРБАЕВ

Бөлісу