Шахмат академиясы ашылды

Бүгін қазақтың шахмат спортында қос жаңалық болды. Бірі - Алматыда Жансая Әбдімәлік атындағы шахмат академиясының ашылуы. Екіншісі - шахматтан әлемнің 12-ші чемпионы, халықаралық гроссмейстер Анатолий Карпов пен Жансая Әбдімәліктің сайысқа түсуі. Отандық шахмат тарихында бұрын-соңды болмаған мұндай қадамды - Тұңғыш Президент Қоры ұйымдастырып отыр.

 

Енді шахмат әліппесін танып, шеберлігін  шыңдаймын деген 4 жастан асқан балалар мен жасөспірімдер Жансая Әдбімәлік атындағы шахмат академиясына келетін болады.

 

Жаңа академияның тұсауын әлемнің бірнеше дүркін жеңімпазы, шахмат шебері Анатолий Карпов кесті. Небәрі 23 жасында әлемді мойындатқан гросмейстер дарынды Жансаяға батасын берді.  

 

 

Мұнан соң, ҚР Тұңғыш Президентінің Қорында Анатолий Карпов пен Жансая Әбдімәліктің матчы басталды. 4 партиядан тұратын текетіресте ұлтымыздың қаршадай қызы 12-ші әлемдік шахмат тәжін киген хас шебермен тамаша ойнады.

 

 

3,5 сағатқа созылған сайыста Жансая 2 партия рапидте де ұтылды. Әйткенмен, қарулы қарсыласын қатты састырды. Ал, 2 блицтің бірінде тең түсіп, екіншісінде жеңді. 13 жасар жас дарынның тәжірибесі мен шебер жүрісіне тәнті болған әлем чемпионы, Жансаяның шеберлігіне оң баға берді.

 

Бірінші партияда мені тығырыққа тіреді. Мықты қарсылас, қиын жағдайлардан тез шығып кетеді. Егер ол алда көп тер төгіп, еңбектенсе, биіктерден көрінетініне сенімім мол.

 

 

Осындай екі шебердің кездесуі келешек жас шахматшыларға үлгі. Қадамын шахматтан басаған жеткіншектер енді жаңа академияда халықаралық деңгейдегі отандық және шетелдік жаттықтырушылар мен гроссмейстерлерден дәріс алады. Сәтін салса, Жансаяның жаңа академиясы ел мерейін үстем етер шахматшылардың ұстаханасына айналмақ.