Басты Жаңалықтар Юлия Галышева спорттағы карьерасына нүкте қоймақшы

Юлия Галышева спорттағы карьерасына нүкте қоймақшы

10.02.2014 05:31

Сочи Олимпиадасында могулден жарысқа түсіп, финалға өте алмаған қазақстандық спортшы Юлия Галышева спортпен қош айтысуы мүмкін. Бұл туралы ол ақпарат құралдарына берген сұхбатында мәлімдеді.

«Мен жақсы нәтиже көрсеттім деп ойлаймын. Бізге тіпті, басқа елдің жаттықтырушылары келіп, бұдан да жоғары орынға лайық екенімізді айтты»,-дейді спортшы.

Қазақстандық тарап арызданған, алайда, ол қабылданбады. Себебі, «төрешілерге наразылық көрсетуге болмайды, тек техникалық қателіктер ғана саналады», дейді Юлия.

21 жастағы спортшы қыздың бұл – екінші Олимпиадасы. Бірақ, енді ол әрі қарай жалғастырмайтынын айтады: «Келісімшарт мерзімі мамыр айында бітеді. Сол уақытқа дейін жаттығатын боламын, одан кейін спорттық карьерамды жалғастыруым екіталай».

Ал анасы Светлана: «Қызым Олимпиадаға тек медаль үшін келген. Оны алтылыққа әдейі енгізбеді. Себебі, жүлде алатынын сезді. Бізді Әлем кубогы, Әлем чемпионаты сынды ірі додаларда талай рет аяқтан шалды. Ешқашан ақтық сынға жеткізген емес, қорқады себебі»,-дейді.

«Жанкүйерлерге мың алғыс. Бізді қолдау үшін елден осынша жанкүйер жиналады деп ойламаппын. Трибуналарда еліміздің қанша Туы желбіреп тұрды?! Бұл әрине, өте әсерлі. Жарыс біткеннен кейін де қолдаған жанкүйерлерге рахмет»,-дейді Юлия.

14 ақпанда фристайлшы қыз Қазақстанда болады.

Бөлісу