Президент Төтенше жағдайлар министрін қабылдады

Мемлекет басшысы Төтенше жағдайлар министрі Мұрат Мұхановты қабылдады. Кездесу барысында Қасым-Жомарт Тоқаев министрлік қызметіндегі басым бағыттарды айқындап, ведомствоға бірқатар нақты міндет жүктеді. Нақтырақ айтсақ, Президент маусымдық төтенше жағдайларға дайындықты пысықтау, аудандық және ауылдық бөлімшелерді одан әрі дамытып, оларды техникалық жарақтандыру деңгейін арттыру жөнінде тапсырма берді. Өрт, өнеркәсіп және сейсмология қауіпсіздігі мәселелеріне, халықты хабардар ету жүйесін жетілдіруге, сондай-ақ қатерлерді болжау мен ерте анықтау үшін цифрлық шешімдерді, жасанды интеллектіні енгізуге ерекше назар аударылды. Президент ведомствоның кадрлық әлеуетін нығайтып, құтқарушылардың кәсіби даярлығын күшейтуді тапсырды.