Ақтөбеде қоғамдық орындарды ластағандар жауапқа тартылды

Ақтөбеде қоғамдық орындарды ластаған тұрғындар бейнебақылау камераларының көмегімен анықталып жатыр. Биылдыққа 1171 дерек тіркелген. Оның 47-сі кәсіпкерлерге қатысты. Ал талапты бірнеше рет бұзған 35 адам 40 сағатқа, тағы сегізі 80 сағатқа қоғамдық жұмысқа тартылды. Полицейлердің айтуынша, бейнебақылау камералары қоғамдық тәртіпті бақылаумен қатар, құқықбұзушылықтарды дер кезінде анықтауға көмектеседі.

Аулалар мен ортақ қолданыстағы аумақтарды күтіп ұстау талаптарын бұзғандар да құқық қорғаушылардың назарынан тыс қалмайды. Кінәлі адамдар заң аясында жауапкершілікке тартылды.

Нұргүл Жолдыбаева, ПД Қоғамдық қауіпсіздік басқармасы, үгіт-насихат тобының аға инспекторы:

Жыл басынан бері абаттандыру талаптарын бұзғандарға қатысты 6215 әкімшілік хаттама толтырылып, 6 мыңнан астам адамға ескерту жасалды. Сонымен қатар талаптарды орындамаған 14 кәсіпкерге 30 АЕК мөлшерінде айыппұл салынды. Бұл – жай ғана статистика емес, қаладағы тәртіпті қамтамасыз ету бағытындағы нақты жұмыстың нәтижесі.