СҚО-да жылжымалы дәріхана жұмыс істей бастады

Солтүстік Қазақстан облысында алғаш рет жылжымалы дәріхана пункті іске қосылды. Енді Қызылжар ауданының шалғай елді мекендерінің тұрғындары қажетті дәрі-дәрмек алу үшін аудан орталығына арнайы бармайды. Дәріхана бекітілген кестеге сәйкес ауылдарды аралап, тегін берілетін препараттарды да тұрғындарға апарып береді. Жоба Қызылжар ауданы әкімінің тапсырмасы бойынша жүзеге асырылып отыр. Негізгі мақсат – шалғай елді мекендерде тұратын халыққа дәрі-дәрмекті қолжетімді ету.

Жылжымалы дәріханада артериялық гипертензия, жүректің ишемиялық ауруы, қант диабеті сияқты ауруларға арналған дәрі-дәрмектер, балалар тағамы және өзге де препараттар бар. Тұрғындар қажетті дәрінің бар-жоғын алдын ала негізгі дәріханаға хабарласып, нақтылай алады.