Ел жаңалықтарына шолу

Қазақстан мен Әзербайжан Каспий теңізіндегі жолаушылар тасымалын қайта іске қоспақ. Қазақстанның Әзербайжандағы елшісі Алим Байельдің айтуынша, Қазақстан тарапы «Құрық-Баку-Құрық» бағыты бойынша паром қатынасын жандандыруды ұсынған. Пандемия кезінде тоқтаған  қатынас қайта іске қосылса, екі ел арасындағы туристік алмасуға серпін беріп, Орта дәліздің мүмкіндігін кеңейтуге ықпал етеді.

Қазақстан мен Өзбекстан алтын қорын толықтыру бойынша әлемдегі көшбасшы елдердің қатарына енді. World Gold Council мәліметінше, қаңтар-шілде аралығында Қазақстан шамамен 29 тонна, ал Өзбекстан 40 тонна алтын сатып алған. Осы көрсеткішпен Өзбекстан әлемдегі ең ірі алтын сатып алушылар арасында үшінші орынға жайғасса, Қазақстан да алғашқы бестікке енді. Халықаралық резервтеріндегі алтынның үлесі қазір шамамен 75 пайызды құрайды. Ал Өзбекстанда бұл көрсеткіш 87 пайызға жеткен.

Қазақстан жылқы саны бойынша әлемде төртінші орынға шықты. БҰҰ-ның Азық-түлік және ауыл шаруашылығы ұйымының 2024 жылғы дерегіне сәйкес, елімізде 4,4 млн жылқы бар. Осы көрсеткішпен Қазақстан Қытайды басып озып, Орталық Азиядағы көшбасшылығын сақтап отыр. Әлемдік рейтингте Мексика 6,4 млн жылқымен бірінші орында. Одан кейін тізімге Бразилия, Моңғолия жайғасқан. Орталық Азияда Қазақстаннан кейін Қырғызстан бар.