Конституциялық сотқа жүгіну – құқықтық айқындықтың кепілі

Бұрынғы Конституция бойынша қызмет атқарған тұлғаларды жаңа Конституция негізінде тағайындауға бола ма? Мемлекет басшысының Конституциялық Сотқа жүгінуі осы мәселені нақтылап берді дейді сарапшылар. Олардың сөзінше, бұл қадам заң нормаларын дұрыс түсіндіруге және құқықтық айқындықты қамтамасыз етуге бағытталған.

Бақытжан Бұқарбай, саясаттанушы:

Бұл енді қалыпты практика ғой. Бұл жерде бәрі дұрыс жасалды деп ойлаймын. Жаңадан конституция, жаңа архитектура қалыптасып жатыр. Және осы жағдайда қандай да бір белгісіздік, қандай да бір манипуляция қоғамда болып кетпеуі үшін Президенттің конституциялық сотқа жүгінгені дұрыс деп ойлаймын.

Айдос Сарым, Мәжілістің VIII шақырылымының депутаты:

Олардың осыған дейін істеген еңбегі, еңбек өтілі ескі конституцияның есебінен есептелуі керек пе? Әлде жаңасымен есептелуі керек пе деген сұрақ туындады. Сол себепті Президент конституциялық сотқа жүгінді. Жауаптарын көрдіңіз. Менің ойымша бәрі айқын, анық айтылған. Бірақ бұл міндетті түрде ертең болатын сайлау, арғыкүні болатын сайлау деген сөз емес. Бұл конституциялық мүмкіндік. Яғни осы заңдық процедуралардың тәпсірленуі деп айтуға болады.