Қазақстан мен Кения Президенттері келіссөз жүргізді

Кенияның шайы мен кофесі біздің ел арқылы Еуразия құрлығына тасымалдануы мүмкін. Шығыс Африка мемлекеті Қазақстанды сауда мен инвестицияны дамытудағы маңызды логистикалық хаб ретінде қарастырып отыр. Астанада екі елдің президенттері келіссөз жүргізді. Мемлекет басшысы Кения Қазақстанның Африка құрлығындағы маңызды әрі сенімді серіктестерінің бірі екенін атап өтті. Сонымен қатар нарықтар мен көлік бағдарларын байланыстырып, тың мүмкіндіктерге жол ашу арқылы Орталық Азия мен Африка арасына дәнекер бола аламыз деп атап өтті. Президент сауда мен инвестиция мүмкіндіктерін кеңейту үшін Іскерлік кеңес құруды ұсынды. Ал Уильям Руто Қасым-Жомарт Тоқаевпен 2023 жылы БҰҰ-ның Бас Ассамблеясында кездескенін атап өтіп, сол жүздесу екі елдің қарым-қатынасын одан әрі нығайтуға негіз болғанын жеткізді. Тараптар ауыл шаруашылығы, көлік-логистика, ақпараттық технологиялар, электрондық үкімет, ғарыш, қаржы және туризм секілді салаларда серіктестікті нығайту мүмкіндітерін талқылады.
Қасым-Жомарт Тоқаев, Қазақстан Республикасының Президенті:

Кения – Африканың қарқынды дамып келе жатқан және озық елдерінің бірі. Географиялық тұрғыдан елдеріміз алшақ орналасса да, бізді жаңғыруға деген ұмтылыс пен болашаққа сенімді көзқарас біріктіреді. Қазақстан Еуразия жүрегінде орын тепкен, ал Кения Шығыс Африканың экономикалық орталығы саналады. Бұл екіжақты серіктестікті кеңейту тұрғысынан айрықша мәнге ие.

Президент мырза, Найроби қаласында тұрақты елші тағайындау туралы шешіміңіз Сіздің және Үкіметіңіздің Қазақстан мен Кения арасындағы байланыстарды ілгерілетуге маңыз беріп отырғандарыңызды байқатады. Менің сапарым – елдеріміздің ынтымақтастығын нығайтуды көздейтін нақты қадам. Оған еш күмән жоқ. Өзара сауда-саттықты арттыру бағытында айтарлықтай әлеуетіміз бар деп ойлаймын.