Астанада үздік экомектептер марапатталды

Астанада «Cyclelab: Болашақ экологиясы» атты жоба нәтижесінде экологиялық мәдениетті дамытуға үлес қосқан үздік мектептер марапатталды. Олар экология саласындағы тың идеяларды ұсынып, қалдықтарды қайта өңдеу, сұрыптау бағытында өз жобаларын қорғады.  Байқау қорытындысы бойынша 2 мыңға жуық келі қалдық жинаған 77-мектеп гимназиясы бас жүлде иегері атанды. Акция барысында білім беру ұйымдарына 2730 экоурналар орнатылып, «EcoQolday» цифрлық жүйесі енгізілді. Жасыл даму АҚ қолдауымен өткен жоба, әрі қарай өз жалғасын таппақ.

Нұржан Дүйсебай, «Жасыл даму» АҚ қоғаммен байланыс қызметінің басшысы:

Бұл іс-шараны Астана, Жезқазған қалаларынан бөлек, биыл 15 облыстық қалаларда өткізу жоспарланып отыр. Жалпы басты мақсаты - жас балаларды, оқушыларды экологиялық мәдениетті қалыптастыруға мүмкіндік беру. Сонымен қатар Президенттің «Таза Қазақстан» экологиялық мәдениетін де қалыптастыруға мүмкіндік береді.