Көкшетауда аутизмге шалдыққан балаларды қолдау орталығы ашылды

Тәуелсіздік күні қарсаңында Көкшетауда аутизмге шалдыққан балаларды қолдау орталығы ашылды. Мамандар облыста ерекше күтімді қажет ететін балалардың саны жыл сайын артып келеді дейді.

Мәселен, өңірде 13 мыңнан астам ерекше білім беруді қажет ететін бала тіркелген, олардың 824-інде аутизм белгілері бар. Жаңа орталық 30 орынға шақталған. Оның негізгі мақсаты ерекше балаларды әлеуметтендіру, бейімдеу және олардың коммуникациялық дағдыларын дамыту. Шамамен 40 маман тәрбиеленушілерге қоғамға бейімделу үшін қажетті негізгі дағдыларды үйретеді, деп жоспарланып отыр.

Орталықта қысқамерзімді, күндізгі және тәулік бойы жұмыс істейтін топтар қарастырылған. Бұл жерге қабылдау кезінде балаларға диагностика жүргізіліп, нәтижесіне қарай тиісті топқа бөлінеді. Сондай-ақ тәрбиеленушілер үшін тегін ыстық тамақ қарастырылған.