Азия елдеріндегі тасқын құрбандары мыңнан асып кетті

Индонезияда тасқын мен лай көшкіні құрбандарының саны 502-ге жетті. Тағы 500-ден астамы жоғалып кеткен. Қазір бұл елде су тартылып, жолдар мен көпірлер және байланыс қызметі қалпына келтіріліп жатыр.

Жалпы алғанда, Индонезияда, Таиландта, Малайзияда су апатынан қаза тапқандар 700-ге жақындап қалды. Сонымен қатар миллиондаған адам зардап шегіп, жүздеген мың тұрғын  эвакуацияланған.

Енді Азияның оңтүстігіне ойыссақ, Шри-Ланкада «Дитвах» циклонынан опат болғандар қатары 355-ке жетіп, 366-сы жоғалып кетті. Мұнда да жауындатып соққан дауыл тасқынға ұласты. Қазір 24 мыңдай полиция офицері, жауынгерлер және әуе күштерінің қызметкерлері топан судың ортасында қалған тұрғындарға жетуге әрекет жасап жатыр.