Ақ үйдің жанындағы атыста 2 жауынгер ауыр жараланды

Вашингтондағы Ақ үйдің қасында атыс болып, Ұлттық гвардияның екі жауынгері жараланды. Қазір олар ауыр халде жатыр. Мұны Федералдық тергеу бюросының директоры Кэш Патель мәлімдеді.Шабуылшының өзі де жараланып, тұтқындалды. АҚШ үкіметі өкілдерінің сөзінше, ол Құрама Штаттарға Ауғанстаннан 2021 жылы барған.

Президент Дональд Трамп бұл оқиғаны «террор актісі» деп атап, әрбір ауғандықты тексеруді тапсырды. Сонымен қатар Трамп Вашингтонның қауіпсіздігін қамтамасыз етуге 500 сарбаз жөнелтуге бұйрық берген.

ФБР қазір шабуылдың себебін Ішкі қауіпсіздік министрлігімен және АҚШ Құпия қызметімен бірлесіп анықтап жатыр. Осы атыстан соң, Ақ үй карантинге жабылды.