Женевада Украина мәселесі бойынша келіссөздер қайта жалғасады

Женевада Украинадағы соғысты тоқтату жөнінде келіссөздер өтті және бүгін қайта жалғасады. Украина мен Құрама Штаттар делегациясы президент Дональд Трамп ұсынған бейбіт жоспарды талқылады. АҚШ мемлекеттік хатшысы Марко Рубио мәлімдегендей, жексенбідегі кездесу жемісті болды. Басқосу нәтижесінде «бейбітшілік жайлы жаңартылған, жетілдірілген құжат» пайда болған. Айта кетсек, өткен аптада Трамп әкімшілігі 28 пунктен тұратын жоспар ұсынды. Оған сәйкес, Украина Ресейге жерін беріп, әскерін қысқартып, НАТО-ға өту арманымен қош айтысуы керек. Бірақ төрт жылға жуық қан төккен украиналықтар бұл жобаны капитуляцияға теңеп, оны қабылдаудан бас тартып отыр.