Қазақстан интернеттің қауіпсіз және заманауи инфрақұрылымын нығайтуға мүдделі

Қазақстан интернеттің қауіпсіз әрі Web3 технологияларына негізделген заманауи инфрақұрылымын дамытуға мүдделі. Осы мақсатта ел үкіметі Cointelegraph компаниясымен меморандумға қол қойды. Web3 – деректер орталықтандырылмайтын, қолданушы өз цифрлық активін өзі басқаратын жаңа интернет моделі. Cointelegraph әлемдегі ең ірі Web3 медиаларының бірі ретінде ақпараттық қолдау көрсетіп, экожүйенің дамуына ықпал етеді. Серіктестік аясында компания Қазақстанға білім беру бағдарламаларын әзірлеуге, бірлескен зерттеулер жүргізуге және блокчейн мен финтех бойынша халықаралық іс-шаралар ұйымдастыруға көмектеседі. Сонымен қатар Cointelegraph еліміздің цифрлық бастамаларын жаһандық аудиторияға танытып, Қазақстанның технологиялық беделін арттыруға үлес қосады.