«Ұшқыр ойлы, дара Дидахмет» еңбегі жарық көрді

Алматыда көрнекті жазушы, «Алаш» халықаралық әдеби сыйлығының лауреаты Дидахмет Әшімханұлының туғанына 75 жыл толуына орай еске алу кеші өтіп, екі томдық жинақ таныстырылды. Құнды еңбекте қарымды публицистің 40 жылға жуық уақыт ішінде жазған мақалалары мен сүбелі сұхбаттары біріктірілген. Топтамада ұлтымыздың ділі мен тілі, салт-дәстүрлері жайлы маңызды мағлұматтар бар. «Қос томдық жинақ оқырманды ұлттық рух пен ой биігіне жетелеп, болашақ ұрпақ үшін баға жетпес қазына болары сөзсіз», – дейді зиялы қауым.

Мереке Құлкенов, Қазақстан Жазушылар одағының төрағасы:

Публицистика мен көркем әдебиетті мейлінше жақындатуға тырысқан бір жазушы болса, ол – Дидахмет деп айтамыз. Өйткені Дидахмет не жазса да, көркемдік жағына қатты көңіл бөлді. Ол табиғатты өте жақсы сүйген. Сондықтан көркем шығарма мен публицистикадағы алшақтықты жақындатып жазды.