Жаңалықтарды Telegram арнамыздан оқыңыз!Еліміздегі демографиялық жағдайды жақсарту мен көпбалалы аналарды қолдау мақсатында отбасыларға жан-жақты қолдаулар көрсетіліп келеді. Бүгінде көпбалалы жанұяларға материалдық көмек көрсету, оларды баспанамен қамту, ай сайынғы жәрдемақылар төлеу мен салықтан босату сияқты жеңілдіктер қарастырылған. Нәтижесінде бала туу көрсеткіші жоғарылап, 6-7 баласы бар отбасылар көбейген.
Түркістан облысының Сайрам ауданында тұратын Бабашевтар отбасы көпбалалы отбасылар қатарында. Жеті құрсақ көтерген ана Роза Қарақұлованың тұңғышы 20 жаста болса, кенже ұлы енді бір жасқа толды. Көпбалалы ана мемлекеттен берілетін жәрдемақылардың көп көмегі тиетінін айтады.
Роза Қарақұлова, көпбалалы ана:
7 балаға 110 мың тг, кішкентайым 1,5 жасқа дейін 35 мың қаржылай көмек аламын. Оларды киіміне, оқу-құралдарына жұмсап жатырмын, шүкір, жетеді.
Бүгінде еліміздегі көпбалалы аналардың төрттен бірі Түркістан облысында. Яғни, 185 мыңнан аса жанұяда кәмелет жасына толмаған төрт және одан көп перзенті бар. 9 мыңға жуық отбасыға атаулы әлеуметтік көмек төленіп, баспана бөлінгенде де көпбалалы жанұяларға басымдық беріледі. Сонымен қатар демеушілер есебінен де қолдау бар.
Айжан Беркінбаева, Түркістан облыстық Жұмысты үйлестіру және әлеуметтік бағдарламалар басқармасының бөлім басшысы:
Бүгінгі таңда айтатын болсақ, 676 отбасы 107 млн теңгенің демеушілік көмегі көрсетілді. Және үйсіз жүрген 7 отбасы тұрғын үймен қамтылды.
Ал елімізде көпбалалы және жаңадан босанған аналарға 5 түрлі жәрдемақы төленеді. Мемлекеттік әлеуметтік сақтандыру қорынан 2 түрлі әлеуметтік төлем қарастырылған. Ағымдағы жылы ең көп жәрдемақыда осы көпбалалы отбасыларға төленген.
Алтынжан Темірбайқызы, ҚР Еңбек және әлеуметтік қорғау министрлігінің бас сарапшысы:
4 және одан көп кәмелеттік жасқа толмаған баласы бар отбасыларға 1 тамыздағы жағдайға сәйкес орта есеппен аталған жәрдемақыны 613 мыңнан отбасы жалпы соммасы 308 млрд теңгені алды.
Сала мамандары елдегі тұрақтылық пен мемлекеттің қаржылай қолдауының арқасында жыл санап демографиялық өсім байқалып, 4 және одан көп отбасылардың көбейіп жатқанын айтады.
Айнұр Әбілқасымқызы
