Трамп Сирияға қарсы санкцияларды ресми түрде доғарды

АҚШ президенті Дональд Трамп Сирияға қарсы экономикалық санкцияларды алып тастау туралы қаулыға қол қойды. Мұны Ақ үйдің баспасөз қызметі хабарлап отыр. Америка әкімшілігінің мәлімдеуінше, Трамптың бұл шешімі тұрақтылық пен бейбітшілікке жасалған қадам. Және де жаңа қаулы Сирия экономикасын қалпына келтіру жолындағы кедергілерді жойып, Араб Республикасын әлемге қайта ашады.

Айта кетсек, Сирияда Башар Асад режимі былтыр желтоқсанда құлатылды. Соған байланысты Трамп биыл мамырда бұл мемлекетті халықаралық шектеуден босатуға кіріскені белгілі.

Арыстан Рысбек