Ақмола облысындағы өзен-көлдерде мұз жару жұмыстары басталды

Ақмола облысында көктемгі су тасқынының алдын алу мақсатында өзен-көлдерде мұз жару жұмыстары басталды.

Бүгін Көкшетаудағы Қопа көлінде, Қылшақты өзенінің сағасына жақын жерінде мұз жару жұмысы жүргізілді. Бұл қарғын судың кедергісіз көлге құюы үшін жасалуда. Демалыс күндері дәл осындай жұмыстар Атбасар, Аршалы, Жарқайың, Шортанды және Бұланды аудандарында атқарылды. Нәтижесінде су айдындарындағы 13 мың шаршы метр аумақта мұз ойылды. Оған екі мың келіге жуық жарылғыш зат пайдаланылған.

Ерсайын Қойшыбаев, Ақмола облысының төтенше жағдайлар департаментінің ресми өкілі:

Мұз жару жұмыстарымен қатар төтенше жағдайлар департаментінің ұйымдастыруымен «Көктемге дайындық» акциясы өтуде. Оның аясында жалғызбасты зейнеткерлер мен халықтың әлеуметтік осал топтарының ауласын қардан тазаладық. Одан қалды жергілікті атқарушы орган өкілдерінің ұйымдастыруымен арықтар мен өзге де су өткізу жүйелері қар мен қоқыстан тазартылуда.

Бибінұр Әмірханқызы