Жаңалықтарды Telegram арнамыздан оқыңыз!Қыс басталғалы Астанадан 1 млн 700 мың текше метр қар шығарылды. Коммуналдық қызмет мамандары ауа райының қолайсыздығына қарамай, күн-түн демей, қала тазалығы үшін еңбек етіп жүр. Жұрт көбіне елей бермейтін тазалықшылардың ерен енбегі жайында тілші материалында.
Гүлбақыт Үрімқызының үскірік желдің өтінде жүріп, омбы қарды тазалап еңбек еткеніне 10 жылдан асты. Бұған дейін сауда жасап күн көрген. Енді отбасын асырау үшін Астанаға іргелес ауылдан қатынап жұмыс істейді.
Гүлбақыт Үрімқызы, тазалықшы:
Таңғы 6-да жұмысқа шығамыз. Сол үшін таңғы 3-те тұрамыз. Таңғы 3-те тұрып шайымызды ішіп, содан кейін көлікке отырып, 1 сағат жол жүріп осы жерге кеп киімімізде ауыстырамыз. Сосын жұмысқа шығамыз.
Қалың қар түскен күндері жұмыс тіпті қауырт. Гүлбақыт әжей машақаты көп жұмыс болса да қала тазалығы, жұрт қауіпсіздігі үшін тер төгуге дайынмын дейді.
Гүлбақыт Үрімқызы, тазалықшы:
Осы біздегі адамдардың көбінің аяғы-қолы, қақсайды. Ауырады. Көбі содан бүйрегі ауырады деген секілді. Сол суықтан ғой енді. Жазда шыжыған ыстықта жүреміз. Қыста сақылдаған аязда жүреміз. Жұмысымыз сол енді.
Мұнда дәл осылай тынымсыз еңбек еткен 600-дан астам адам бар. 57 жастағы Серікбек Әділхан да 2 жылдан бері коммуналдық салада. Ай сайынғы жалақысы – 200 мың теңге. Адал жолмен тапқан табысымды немерелерімнің қуанышы үшін жұмсаймын дейді.
Серікбек Әділхан, жол жұмысшысы:
Жалпы осы тазалық жөнінде жаным жақсы көреді, сүйіп істеймін, тазалық жөнінде, бір жақсы қалада тұрғаннан кейін жақсы. Өркениетті ел болу үшін бір адамдай үлесімді қоссам деймін. Жұмыс істеу әр адамның отандық борышы деп есептеймін.
Қала көркі – тазалық, ал қоғам – оның айнасы. Осылай деген коммуналдық қызмет мамандары тұрғындар да тазалық мәдениетін сақтап, өз шаһарына бей-жай қарамаса екен дейді.
Айя Мүтәлі
