Жаңалықтарды Telegram арнамыздан оқыңыз!Ақмолалық Умар Шоназаров елге өзінің адамгершілік қасиетімен танылып жүр. Ол былтырғы су тасқынынан зардап шеккен аймақтарға 58 млн теңгеге материалдық көмек көрсеткен. Сөйтіп қиын сәтте ауыртпалықты халықпен бірге еңсеріп, бірліктің жарқын үлгісін көрсете білді.
Умар Шоназаров, Ақмола облысының «Санги-Кабуд» тәжік этномәдени бірлестігінің төрағасы:
Біз біртұтас ел ретінде бірігіп, су тасқынынан зардап шеккендерге қолдау көрсете білдік. Мен де құтқару операциясына қатыстым. Ең бастысы таза ауызсу керек болды. Онымен де қамтыдық.
Жомарт жанды азамат өңірге қайырымды істерімен танымал. Әлеуметтік жағдайы нашар отбасылар мен мүмкіндігі шектеулі балаларға да әрдайым сүйеу болып жүреді. Умар Шоназаровтың нағашылары Қазақстанға депортацияланған. Сондықтан қиын-қыстау кезеңде өзге ұлт демей, барымен бөлісіп, аштықтан аман алып қалған қазақ халқының жомарттығы туралы әңгімелерге жастайынан қанық.
Умар Шоназаров, Ақмола облысының тәжік этномәдени бірлестігінің төрағасы:
Қайырымды болу – қазаққа тән қасиет. Мен осы елде өсіп-өнгендіктен, бойыма қазақтың осы қасиеті дарыды деп ойлаймын. Алғыс айту күні – әр қазақстандық үшін қасиетті мерекеге айналды.
Бибінұр Әмірханқызы
