Жаңалықтарды Telegram арнамыздан оқыңыз!Премьер-министр Олжас Бектенов миллиардтаған кірісін жасырып, жеңілдетілген шартпен салық төлеп жүрген кәсіпкерлерге осылайша ескерту жасады. Салық органдары оларға жуырда арнайы хабарлама жіберуі тиіс. Үкімет басшысы тиісті талап орындамалса, бұл кәсіпкерлер мемлекет меншігіндегі ресурстарды қолдану құқығынан айырылатынын еске салды. Қаржы министрінің дерегінше, елімізде 2,3 млн кәсіпкер тіркелген. Қосылған құн салығын соның 8 пайызы, яғни 137 мыңы ғана төлейді. Ал 85 пайызы табысын 15 млн теңгеден аспайды деп көрсеткен.
Олжас Бектенов, Премьер-министр:
Қаржы министрінің ақпаратынан салық жүктемесін оңтайландырудың әртүрлі схемаларын қолдана отырып, міндетін адал атқармайтын кәсіпкерлердің барын көріп отырмыз. Миллиардтаған айналыммен олар бюджетке өздерінің тапқан пайдасына мүлдем сәйкес келмейтін сомаларды төлейді. Бізде осындай ірі компаниялардың толық тізімі бар. Ол тізімде BI Group, BAZIS және басқа да көптеген ірі құрылыс компаниялары жүр. Экономиканың басқа салаларында жұмыс істейтін белгілі әрі танымал мейрамханалар, фитнес-клубтар және әртүрлі компаниялар бар.
Айя Мүтәлі
