Жаңалықтарды Telegram арнамыздан оқыңыз!Қарағанды облысы Шахтинск қаласында «Таза бейсенбі» акциясы өтті. «Amanat» партиясының бастамасымен тұрақты өткізіліп келе жатқан шарада еріктілер қар күреп, тұрғындарға көмектесті. Бүгінде «Жастар рухы» жастар қанатының белсенділері мен мектеп оқушылары жалғыз тұратын зейнеткердің ауласын қардан тазартты.
Тілеубек Аманжол, Шахтинск қаласының тұрғыны:
Бұл науқандардың берері мол деп ойлаймын. Жастарға қаламызды, тұрған жерімізді таза ұстауға үйретуіміз керек. «Қарты бар үйдің - қазынасы бар». Қаламызда соғыс, еңбек ардагерлері бар. Жастар сол кісілердің ауласын тазартып, көмектеседі.
Ал Жетісу облысындағы Текелі қаласында табиғат жанашырлары халық ең көп жүретін орындарды қар мен күл-қоқыстан тазартты. Жыл басынан бері қаладан 8 тонна қоқыс пен 4 мың текше метр қар шығарылған. 2 балабақша мен 8 мектептің айналасындағы еріген қар суы арықтарға бұрылып, спорт алаңдары тазартылды.
Бауыржан Тұғылбаев, Текелі қалалық мәслихатының төрағасы:
Енді көктем шыға бастайды. Қар еріп кеткеннен кейін астынан неше түрлі қоқыс шығады. Осы қоқысты уақытымен үнемі тазалап тұрамыз. Бүгін қар жатқан соң мына балалар ойнайтын алаңды тазалап тастайық деген мақсатпен шығып отырмыз.
Жандос Бақытұлы, Қуаныш Қанатұлы
