Оралда «Таза аула автобусы» жолға шықты

Оралда ерікті жастар «Таза аула автобусы» акциясы аясында көп пәтерлі тұрғын үйдің ауласын қоқыстан арылтты. Волонтерлар әлеуметтік желі арқылы өтініш қабылдайды. Соған сай мекенжайға автобуспен келіп, ауладағы тал-теректің түбін қопсытады, әктейді. Желмен ұшып, айналаға шашылған тұрмыстық қалдықтарды жинайды. Жастар ескі гараж аумағын да қоқыстан тазалады. Бұл жолы тұрғындар да белсенділік танытты. Акция басталғалы 35 аула жиналған. Іс-шара жалпыұлттық экологиялық «Таза Қазақстан» акциясы аясында ұйымдастырылды.

Аманат Бектұрсынов, қалалық жастар ресурстары орталығының бөлім басшысы:

Біздің мақсатымыз – бір аула тұрғындарының басын бір жерге тоғыстыру. Яғни туған жерге сүйіспеншілігін арттыру, аулаларын таза ұстауға ынталандыру. Бұл акцияға 12 мыңға жуық қала тұрғыны қатысты.

Ардақ Мұратқызы