Жамбылда су арнасы тазаланды

Жамбылда «Таза Қазақстан» экологиялық акциясы басталғалы 800 мыңға жуық адам қатысып, 16 мың тонна қоқыс шығарылды. Ал тазалық науқанына тұрғындар мен еріктілердің қосқан үлесі көп.

Бүгін де аталған акция облыс орталығы мен аудандарда жалғасты. Таразда 200-ге жуық түрлі сала қызметкері мен белсенді жас «Сеңкібай» су арнасының жағалауын тазартты. Табиғат жанашырлары каналды күл-қоқыстан тазарту арқылы күзгі тасқындардың алдын алуға болады, - дейді. Жалпы өңірде көктемнен бері 818 шақырым канал мен арық жүйесі тазартылған.

Дархан Қуанышұлы, ерікті:

«Жасыл ел – Еңбек Тараз» ЖШС тазалап үлгермейді. Оған біз сияқты белсенді жастар, түрлі сала өкілдері көмектесіп, тазалық жұмыстарына ат салысып жатыр. Қаланың келбетін келтіріп отыр ғой. Енді бұл келесі жылы да өз жалғасын тапса деймін.

Данияр Әлімқұл