Өзбекстанда Сенат депутаттарының саны қысқарады

Өзбекстанда Сенат депутаттарының саны 100-ден 65-ке қысқарады. Парламент палаталарының бір-бірін қайталайтын өкілеттіктері енді болмайды. Жаңартылған Конституцияға сәйкес, елде осындай өзгеріс енгізілмек. Бұл туралы Олий Мәжіліс Сенатының баспасөз қызметі мәлімдеді. Әр әкімшілік аумақтан 4 сенатордан сайланады, 9 депутатты президент тағайындайды. Заң шығару палатасы спикерінің орынбасарлары 7-ден 2-ге дейін қысқарады. Мұнан бөлек, осы аптада бірқатар лауазым иелері орынтағымен қоштасты. Өзбекстан президенті инвестиция, экспорт және өндіріс саласындағы ірі лауазым иелерін қызметінен босатты.

Шавкат Мирзиёев, Өзбекстан Республикасының Президенті:

Экспорт экономикаға тікелей әсер ететін сала. Егер валюталық тепе-теңдікті сақтағымыз келсе, импортқа қатысты экспортты тұрақты ұстауға тиіспіз. Дамудың жаңа деңгейіне көтерілу үшін экспортты жылына кемінде 30 пайызға арттыруымыз керек.

Базаркүл Отыншиева